Masuk ibu guru tadi ka kelas itu, hanyar di muhara lawang sudah ada kakanakan nang manyiuti.
“suit...suit...suiwww...tak..tak...” Ada jua nang bakuriak, “Bu...ehem...kawa kah??” Ada jua nang bagandang meja. Pokonya macam-macam lah kalakuan kakanakan ngitu. Tapi si Ibu tadi acuh haja sambil manyabar-nyabarkan hati.
Sampai ka meja guru, imbas maandak tas lalu sidin baucap, “Anak-anak. Hari ini kita belajar menggambar.”
“Horee....asyiikkk....” Jer kanakan himung banar
“Manggambar apa, Bu?” ujar nang saikung.
“Bu..boleh lah ulun menggambar itik bahintalu” ujar nang lainnya.
“Tenang.....tenang,” ujar ibu guru nyaring, “amun buhan pian abut, Ibu kada jadi nah malajari”
Hanyar buhan kanakan tu pina tatenang sadikit. Lalu si Ibu tadi ma’ambil kapur mencontohkan menggambar buah apel. Imbas sudah tuntung menggambar di papan tulis, lalu sidin batakun lawan kakanakan, “ Nah, anak-anak....gambar apa ini, anak-anak??”
“Bur*t, Buu...!!!” sahut kakanakan baimbai.
Kada basuara lagi si Ibu tadi mahancap maninggalakan kelas langsung manuju ka ruang kapala sakolah ba’adu-adu sambil manangis.
“Ulun kada sanggup lagi Pa ae mangajar di kalas 1, bilang kaliwaran sudah kalakuannya, kada baadat kadada lalu supan santun lawan guru. Alih haja ulun ka kalas nang lain,”
“Tanang dahulu, Bu,” ujar kapala sakulah. “Ayu ha kaina lawan Bapa manasihatinya.”
Lalu kapala sakulah masuk ka kalas 1 diiringi oleh ibu guru tadi.
“Anak-anak...buhan pian ni kada boleh mahulut-hulut ibu guru,” Ujar kapala sakulah manasehati kakanakan. “Pian hakunlah kaina jadi anak nang katulahan bila katuju mahulut-hulut guru?”
“Kadaaaa....” sahut kakanakan baimbai.
Kanapa kapala sakulah tadi kada sengaja malihat ka papan tulis.
“Astagfirullah......” ujar sidin takajut, lalu maambil mistar dan mamukulakan ka meja. “Tarrr.....!!!Buhan pian ni sudah katalaluan banar, ni siapa nang wani manggambar bur*it ini di papan tulis??” nyaring suara sidin batakun lawan kakanakan.
Hinip kakanakan kada sing bunyian, masalahnya buhannya paling takutan lawan kapala sakulah.
“Tarrr.....!!!” dihambatakan sidin pulang mistar kayu ka meja. “Sakali lagi nah Bapa batakun, siapa nang wani manggambar bur*t di papan tulis ini.” Ujar sidin sambil manceleng sarik.
“A...anu....anu Pa, tu tadi ulun manggambar buah apel,” Ujar ibu guru sambil tunduk supan banar.
Oleh Amang